دسمبر ۔ سیز فائر سے پشاور تک۔

آہ دسمبر 

دسمبر کا مہینہ ہر پرستار قدرت اور عشاق ندرت کا نہ صرف پسندیدہ ہے بلکہ اس مہینے میں شاعر اپنا بہترین کلام پیش کرکے داد و تحسین وصول کرتے ہیں ۔اس موسم میں بہار سے زیادہ خوبصورتی ، تنوع ، دلفریب، دیدہ زیب ، خوشنما رنگ انسانی ذوق اور جمالیات کو ایسا روحانی سکوں بخشتے  ہیں اور ایسے ایسے اسباق گرے ہوئے پتوں اور ڈالیوں  کی صورت میں ہمیں دکھاتے ہیں جو دنیا کی کوئی کتاب نہ پڑھا سکتی ہے نہ سکھا سکتی ہے۔ زندگی کی نا پائیداری اور بے ثباتی گرے ہوئے پتے اور سر سبز پتے دوسری طرف اس زندگی کے چلتے رہنے کا نام ہے جو اس دن ختم ہو گی جس دن صور اسرافیل بجایاجائیگا  لیکن کیا کروں میں دسمبر کے حسین نظارے  دیکھوں یا ان 90 ہزار فوجی جوانوں کو دیکھوں جو بے رحم سیاست کی بھینٹ چڑھ کر قیدوبند  کی صعوبتیں  برداشت کرتے رہے اور میرا ایک بازو میرے جسم سے جدا ہو گیا۔ میں گرے ہوئے پتوں کی خوبصورتی سے محظوظ ہوں  یا ان پتوں پر آنسو بہاوں جو بن کھلے،آنگن کو حسن بخشنے سے پہلے ہی کسی بے رحم درندے  کی گولی کا نشانہ بن کر اپنے ہی آنگن کے درودیوار کو خون آلود کر کے اپنوں کے خون ہمیشہ کے لئے ڈرنے کو چھوڑ گئے۔ دسمبر تو تو بے رحم نہیں تھا ۔ تیری خوبصورتی تو مجھے پسند تھی تو کیوں مجھے تارتار کر گیا۔ ؟۔۔۔۔۔۔۔۔۔۔۔۔۔۔۔۔۔۔۔۔۔ نہیں تو نے نہیں میں نے خود ہی  اپنے جسم کو تار تار کیا۔ اس کی بوٹیاں  نچوڑیں، اس کو اپنے ہاتھوں سے درندوں کو سونپا اسے اپنے ہاتھوں سے قاتلوں کے بے رحم ہاتھوں ، خون آلود نظروں اور سفاک دل کے ہاتھوں سونپ دیا تاکہ وہ ننھی کلیوں اور ادھر کھلے پھولوں کو اپنی موت اگلتی، بے حس، ننگ  انسان بندوق سے اپنی حیوانیت  اور خون پینے کی پیاس بجھا سکے اور اپنے خود ساختہ مذہب کا نام اونچا کر سکے۔۔۔۔۔۔۔۔۔ لیکن ہم نہ اپنے بازو کو بھولے  ہیں، نہ اپنے بچوں کو بھولیں گے۔ ہم تمیں بھی نہیں بھولیں گے۔ جب تک دنیا رہے گے دسمبر آتا رہے گا۔ اے پی ایس کے بچے ہمیں رولاتے  رہیں گے ہماری آنکھوں کا پانی خشک ہو جائیگا لیکن اے دسمبر ہم اپنے بچوں کو نہ بھولیں گے اور نہ ہم ان کے قاتلوں کو۔